PROXECTO DE DINAMIZACIÓN COMUNITARIA "EMBÁRRIATE TEIS"

 Esta semana visitou o cole a Fundación da Santa Cruz dentro do  proxecto de dinamización comunitaria "Embárriate Teis: encontros nos patios". A través da dinamización comunitaria pretenden promover a integración e a colaboración entre residentes do centro de acollida da fundación (persoas en situación de exclusión social e/ou con problemas de saúde mental) e a comunidade escolar.

Os residentes, acompañados da súa educadora, Uxía, realizaron un obradoiro co obxectivo de fomentar valores como a resiliencia, a empatía e o traballo cooperativo a través dun obradoiro socioeducativo. A actividade contou con dúas partes: 

Primeiro levaron a cabo un contacontos co libro "Rita non se rende" de Tom Percival. Esta historia serviu de ferramenta para traballar o concepto de resiliencia, superpoder que nos permite afrontar desafíos con fortaleza.

A segunda parte do obradoiro foi unha creación artística, nun anaco de tea branca, o alumnado, axudado polos residentes,  plasmou a súa visión da resiliencia.

Cos traballos do alumnado, os residentes da fundación van crear unha bandeira, que será exposta o venres 25 de abril na Vía Verde como parte do Museo da Empatía. 

Unha mostra artística colaborativa que representará o poder da comunidade e a participación social, mellorando o tecido social do barrio e transformándoo nun espazo máis solidario e empático.

Grazas Fundación Santa Cruz polo teu traballo na comunidade de Teis.

 Foi un obradoiro moi especial!